काठमाडौं । नेपाली कांग्रेसले निर्मला पन्तका दोषी पक्राउ गर्न नसक्ने कम्युनिस्ट सरकारका गृहमन्त्रीको राजीनामा माग गरेको छ । वर्तमान सरकारको नेतृत्वमा बसेकाहरू नै दोषीलाई संरक्षण गर्न सक्रिय भएको उनले आरोप लगाए ।

नेपाली रेडियो नेटवर्कमा शुक्रबार बिहान पत्रकार ऋषि धमलासँग कुरा गर्दै कांग्रेस केन्द्रीय सदस्य रमेश लेखकले दुईजना प्रहरीलाई जागिरबाट बर्खास्थ गर्दैमा दोषीले उन्मुक्ति नपाउने बताए ।

‘दुईजना प्रहरीलाई जागिरबाट हटाएर निर्मला पन्तले न्याय पाउँदिनन्’, उनले भने, ‘घटनाको जिम्मेवारी यो कम्युनिस्ट सरकारले लिनुपर्छ । जिम्मेवारी लिएपछि गृहमन्त्रीले राजीनामा दिनुपर्छ कि पर्दैन ?’

यति लामो समयसम्म पनि दोषीलाई पक्राउ गरेर कारबाही गर्न नसकेको भन्दै खड्गप्रसाद ओली नेतृत्वको सरकार र गृहमन्त्री रामबहादुर थापाको कांग्रेस नेता लेखकले खुलेर आलोचना गरे ।

सरकारले दोषीलाई बचाउन अनुन्धानलाई प्रभावित तुल्याउन खोजिए कांग्रेस मात्रै नभई सबै कञ्चनपुरबासीले पुनः आन्दोलन चर्काउने नेता लेखकले चेतावनी दिए ।

कांग्रेस नेता लेखकले निर्मला पन्तका दोषीहरू पत्ता लगाउन नसक्ने गृहमन्त्रीले पदबाट राजीनामा दिनुपर्ने माग गरे । ‘गृहमन्त्रीले पनि जिम्मेवारी लिुनपर्छ । मैले हत्यारालाई कारबाही गर्न सकेन भन्नुपर्छ’, लेखकले भने, ‘हत्यारालाई संरक्षण गरेको छु भन्नु पर्‍यो । जिम्मेवारी लिएपछि के–के गर्नुपर्छ गर्नुपर्‍यो ।’

‘सरकारले हत्यारा पत्ता लगाउनु पर्‍यो । होइन भने हत्यारा पक्राउ गर्न सकेनौँ भन्नु पर्‍यो’, उनले भने, ‘हत्यारालाई सरकारले संरक्षण गरेकै कारण दोषी खुलेआम हिँडेको छ ।’

केही मानिसहरूले कांग्रेसले देखाएर हत्यारा बचाउन लागेको नेता लेखकले बताए । ‘निर्मला पन्तका दोषीलाई संरक्षण गरेर सरकार भाग्न खोज्दै छ’, उनले भने, ‘सरकार पन्छिन खोजेको हो भने दुर्भाग्य हो । दुई अधिकारीलाई हटाउँदैमा निर्मला र उनको परिवारले न्याय पाइएको छैन ।’

गृहमन्त्रालयले कञ्चनपुरका तत्कालीन एसपी दिल्लीराज विष्ट र प्रहरी निरीक्षक जगदीश भट्टलाई जागिरबाट बर्खास्थ गरेपछि कांग्रेसले निर्मला पन्तका दोषीहरूलाई बचाउने षड्यन्त्र गरेको हो कि भनेर आशंका जनाएको छ ।