काठमाडौं । संसदको शिक्षा तथा स्वास्थ्य समितिले चिकित्सा शिक्षा विधेयक बहुमतबाट पारित गरेसँगै प्रधानमन्त्री एवम् नेपाल कम्युनिस्ट पार्टी (नेकपा)का अध्यक्ष खड्गप्रसाद ओली र पुष्पकमल दाहाल ‘प्रचण्ड’ले भक्तपुरमा मार्सी चामलको भात खुवाउने दुर्गा प्रसाइँको गुन तिरेका छन् ।

सत्तारुढ नेपाल कम्युनिस्ट पार्टी (नेकपा) निकट मेडिकल कलेज व्यवसायी दुर्गा प्रसाइँको कलेजलाई सम्बन्धन दिन मिल्ने गरेर बुधबार समितिबाट चिकित्सा शिक्षा विधेयक पारित गरिएको हो । प्रसाइँ नेकपा निकटका विवादास्पद व्यवसायी हुन् ।

प्रसाइँको लगानीमा रहेको झापास्थित बी एण्ड सी मेडिकल कलेजलाई सम्बन्धन दिनकै लागि कम्युनिस्ट सरकारले समितिबाट चिकित्सा शिक्षा विधेयक बहुमतबाट बुधवार पारित गरेको आरोप छ ।

तत्कालीन एमाले र माओवादी केन्द्रलाई पार्टी एकीकरण गराउन दवाव दिने तथा आफ्नै घरमा लगेर मार्सी चामलको भात खुवाएर वातावरण बनाउनमा व्यवसायी प्रसाइँको विशेष भूमिका छ ।

संसदको शिक्षा तथा स्वास्थ्य समितिको बैठकमा सत्तापक्षीय संसदहरूको बहुमतले विधेयक पारित गरेको छ ।

समिति सदस्य एवं कांगे्रेस सांसद गगन थापाले असहमति हुँदाहुँदै विधेयक पारित हुनु दुर्भाग्यपूर्ण भएको बताएका छन् ।

झापास्थित बी एण्डसी र काठमाडौंस्थित मनमोहन मेडिकल कलेजले आशय पत्र लिइसकेका छन् ।

समितिबाट पारित विधेयकको दफा १३ को उपदफा ६ मा यो ऐन जारी हुनुभन्दा अघि सम्बन्धन दिइसकेका र आशय पत्र लिई मापदण्ड पूरा गरेका काठमाडौं उपत्यका बाहिरका शिक्षण संस्थाका हकमा एक विश्वविद्यालयले पाँचभन्दा बढी विश्वविद्यालयलाई सम्बन्धन दिन सक्ने प्रावधान राखिएको छ ।

सरकारले डा.गोविन्द केसीसँग गरेको सम्झौता विपरित रहेको जनाइएको छ । यसअघि सरकारले डा.केसीसँग एक विश्वविद्यालयले पाँचभन्दा बढी शिक्षण संंस्थालाई सम्बन्धन दिन नसक्ने प्रावधान थप्ने सम्झौता गरेको थियो ।

सत्तारुढ दलका नेकपाका नेताहरूको लगानी रहेको मनमोहन मेडिकल कलेजलाई पनि स्थान्तरण गरेर खोल्ने बाटो खुलेको छ । आशय पत्र पाएको र पूर्वाधार पूरा गरेको कलेजले स्थानान्तरण गर्न चाहेमा सरकारले प्रोत्साहन सुविधा उपलब्ध गराउनेछ ।

चिकित्सा शिक्षा सुधारको माग राख्दै आएका डा.केसीले सम्झौता विपरित विधेयक पारित भएकोमा विरोध जनाउँदै इलाममा अनशन शुरु गरेका छन् ।

समितिका सदस्य एवं नेकपाका सांसद योगेश भट्टराईले संसदको सर्वोच्चता र प्रक्रियालाई स्वीकार गर्नुपर्ने बताएका छन् ।