काठमाडौं । नेपाली कांग्रेसका मुख्य सचेतक एवम् केन्द्रीय सदस्य बालकृष्ण खाँणले कम्युनिस्ट सत्ताले प्रमुख विपक्षी दलको प्रश्नको जवाफ दिन नसक्ने अवस्थामा पुगेको भन्दै भागेर हिँड्न थालेको आरोप लगाएका छन् ।

रिपब्लिका दैनिकसँग मंगलबार सिंहदरबारस्थित आफ्नै कार्यकक्षमा कुरा गर्दै कांग्रेसका नेता खाँणले प्रधानमन्त्री खड्गप्रसाद ओली प्रमुख विपक्षी दलको प्रश्नको सामना गर्न अवस्थामा नरहेको बताए ।

‘प्रधानमन्त्रीले सार्वजनिक महत्वको विषयमा मन्तव्य दिएपछि सांसद सदस्यहरूले उठाएको प्रश्नको जवाफ तत्काल दिनुपर्छ’, उनले भने, ‘संसदको नियमावलीअनुसार कांग्रेसले प्रधानमन्त्रीसँग प्रश्न सोध्न माग गरेको थियो । तर, प्रधानमन्त्री ओलीजीले कांग्रेसले सोध्ने प्रश्नको जवाफ दिने आँट गर्नुभएन । सभामुख कृष्णबहादुर महराले पनि ओलीजीलाई प्रश्न सोध्न दिनुभएन । हामीले तत्काली प्रतिवाद गर्‍यौँ । स्थिति तनावपूर्ण बन्यो ।’

सभामुख कृष्णबहादुर महराका कारण संसदमा नेपाली कांग्रेसले नचाहँदा नचाहँदै पनि अप्रिय घटना हुन पुगेको खाँणले बताएका छन् । ‘कांग्रेसले संसदको नियमावली कार्यान्वयनमा अडान राखेपछि सभामुख कृष्णबहादुर महराले आउँदा दिनमा प्रधानमन्त्री र मन्त्रीले सार्वजनिक महत्वको विषयमा सम्बोधन गर्दा तत्काल प्रश्नको जवाफ दिनुपर्ने बताउनुभयो’, खाँणले भने, ‘हामीले त्यसपछि संसद चल्न दियौँ । कांग्रेस कहिल्यै पनि संसद अवरोध गर्ने पक्षमा छैन । संसदको गरिमा बचाउन काग्रेसले सधैँ भूमिका खेल्छ ।’

संसदमा अबरोध गर्ने नेपाली कांग्रेसको कुनै पनि योजना नरहेको मुख्य सचेतक खाँणले बताए । ‘सरकारलाई अफ्ठ्यारो बनाउने कुनै योजना छैन’, उनले भने, ‘हामीले जनताका आधारभूत कुरा पूरा भयो कि भएन भनेर प्रश्न उठाउने हो ।’ उनले जनताका अधिकारप्रति कांग्रेसको सधैँ ध्यान रहने बताए ।

नेता खाँणले भने, ‘ओली र प्रचण्डजीले निर्वाचनमा जनताका माझ के भन्नुभएको थियो ? घोषणा पत्रमा के कुरा राख्नुभएको छ ? त्यो कुरा र काम अहिलेसम्म पूरा गरिएको छैन ।’

ओली र प्रचण्डको अभिव्यक्तिले जनतामा झन् निराशा छाएको उनले बताए । ‘प्रचण्डजीले प्रजातान्त्रिक व्यवस्थामा काम गर्न नसकिँदो रहेछ भनेर भन्नुभएको छ’, कांग्रेसका नेता खाँणले भनेका छन्, ‘कम्युनिस्ट पार्टीका नेता र स्वयं प्रधानमन्त्री ओलीजीले संसदमा गलत तथ्याङ्क दिनु भएको छ । अर्थमन्त्रालयसँग एउटा तथ्याङ्क छ, प्रधानमन्त्री ओलीजीसँग अर्को तथ्याङ्क छ । प्रधानमन्त्री कार्यालयसँग अर्कै तथ्याङ्क छ ।’

कम्युनिस्ट सरकारका प्रधानमन्त्री खड्गप्रसाद ओलीजी पूरै अफसल भएको भन्दै कांग्रेसका नेता खाँणले भने, ‘ओली सरकारबाट जनतामा निरासा छ । नेकपाकै जनप्रतिनिधिहरूले सरकारको पक्षमा खुलेर समर्थनमा बोल्न चाहेका छैनन् । माधवकुमार नेपालले नै सरकारको आलोचना गर्नुभएको छ ।’