भारतपुर । नेपाली कांग्रेसको काँधमा चढेर भरतपुर महानगरपालिकाको मेयरमा विजयी भएकी तत्कालीन माओवादी केन्द्रकी नेतृ एवम् पुष्पकमल दाहाल ‘प्रचण्ड’की छोरी रेणु दाहालले घर भाडाबापत ठूलो रकम खर्च गर्ने गरेको खुलासा भएको छ ।

मेयर दाहालले घरभाडावापत आफैले महानगरपालिकाबाट ३३ हजार ६ सय रुपियाँ बुझ्ने गरेकी छिन् । यो रकम वर्षमा ४० लाख ३२ हजार हुन आउँछ ।

यो रकममा अरु केही थप गरेर घर नै बन्न सक्छ । तर, किन हो मेयर दाहालले यति मोटो रकम घर भाडामा खर्च गर्दै आएकी छिन् भरतपुर महानगरपालिकाका बासिन्दाहरू छक्कै परेका छन् ।

दाहालले पारिश्रमिक पनि पाँउछिन् । महानगरका सबै जनप्रतिनिधिहरूले महिना सकिनेवित्तिकै मोटो रकम तलव भत्ता बुझ्ने गर्छन् ।

पारिश्रमिकसँगै अन्य विभिन्न सेवा सुविधा पनि पाउँछन् । भरतपुर महानगरपालिकाका प्रमुख दाहालको मासिक पारिश्रमिक ४२ हजार रुपियाँ छ । यसमा भत्ता र अन्य सुविधा जोडिएको छैन ।

त्यसबाहेक मेयरदाहाललाई सवारी साधन, इन्धन र घर भाडाको सुविधा पनि छ ।

वडा नम्बर १० मा महानगर आफैँले मासिक ३३ हजार ६०० रुपियाँ सोझै घरधनीलाई दिने गरी मेयर दाहालका लागि घर भाडामा लिएको छ ।

इन्धनबापत मेयर दाहालले गत असोजमा १४ हजार, कात्तिकमा १९ हजार र मंसिरमा १२ हजार रुपियाँ लिएको महानगरपालिकाका लेखा अधिकृत षडानन्द अधिकारीले जानकारी दिएका छन् ।

तीन महिनाको अवधिमा प्रमुख दाहालले इन्धनबापत ४५ हजार रुपियाँ खर्च गरेकी छिन् । दाहालको खर्चमा मितव्ययिता गर्न नेपाली कांग्रेसले बेलाबेला आवाज उठाउँदै आएको छ ।

उपमेयर पार्वती शाहले कुरा उठाउने गरेकी छिन् । तर, दाहालले सुनुवाई गरेकी छैनिन् ।

मेयर दाहालको कार्यशैली र निरंकुशताविरुद्ध गत मंगलबार उपमेयरसहित नेपाली कांग्रेसबाट निर्वाचित जनप्रतिनिधिले २५औँ कार्यपालिका बैठक बहिष्कार गरेका छन् ।

उपमेयर शाहको असन्तुष्टि कर्मचारीले जनप्रतिनिधिलाई नटेरेको, मेयर दाहालले पेलेर जाने गरेको र आफूलाई म्यासेन्जरमा धम्की आउँदा पनि मेयर दाहालले चासो नदिएको आरोप छ ।

महानगरका प्रमुख प्रशासकीय अधिकृत नेत्रप्रसाद सुवेदीले आफूलाई नटेर्ने गरेको उपमेयर शाहको अरोप छ । सुवेदीले मेयर दाहालको चाकडी गर्नमै दिन कटाउने गर्दा भरतपुर महानरपालिकाका सेवाग्राहीहरू मर्कामा परेको गुनासो बढ्दै गएको छ ।

आफूलाई मेयर दाहालकै अगाडि झर्केर बोल्दा पनि दाहालले समस्या समाधानका लागि कुनै पहल नगरेको शाहको आरोप छ ।