नेपाली कांग्रेसले ढिलै भएपनि सहि निर्णय गरेको छ । पार्टीभित्र आन्तरिक द्वन्द्वमा रहेको नेपाली कांग्रेसले कार्यकर्ताका बीचमा आफूलाई लैजाने निर्णय गरेर प्रशंसा पाएको छ ।

कांग्रेसले जसरी प्रशंसा पाएको छ, विरोध पनि भएका छन् । कांग्रेसले पहिलो चरणको जनजागरण अभियानको घोषणा गरेपछि सत्तारुढ नेपाल कम्युनिस्ट पार्टी (नेकपा)का नेताहरूलाई टाउको दुखाइ भएको छ । कांग्रेसको गतिविधिलाई प्रधानमन्त्री समेत रहेका खड्गप्रसाद ओलीले रुचाएका छैनन् ।

ओलीले कांग्रेसविरुद्ध कठोर अभिव्यक्ति दिने गरेका छन् । नेपाली कांग्रेसले प्रधानमन्त्री ओलीको आलोचनालाई शक्तिका रुपमा लिएको छ । ओलीले कांग्रेसको जनजागरण अभियानलाई लक्षित गरेर राजसंस्था ल्याउन गतिविधि गर्न थालेको भनेर आरोप लगाएका छन् ।

तर, कांग्रेसले ओलीले भने जस्तो राजा ल्याउन कुनै पनि गतिविधि गरेको छैन । कांग्रेसले आफूलाई जनतामा केन्द्रित गराउन चाहन्छ । कांग्रेसका नेताहरूको गतिविधिलाई कम्युनिस्ट पार्टीका नेता एवम् प्रधानमन्त्री ओलीले रुचाउने कुरै रहँदैन ।

ओलीले कांग्रेस भताभुङग भएको देख्न चाहन्छन् । कांग्रेस जति कमजोर बन्यो ओलीलाई निरंकुश बन्न त्यति नै सजिलो हुनेछ । कांग्रेसले यो कुरा बुझेका छन् । अब नेपाली कांग्रेसका नेताहरूले आफूभित्र रहेका झिनामसिना कुरालाई भुलेर कांग्रेस बनाउने तर्फ लाग्नुपर्छ ।

वैशाख ११ गतेदेखि शुरु हुने भनिएको जनजागरण अभियान केही दिन पछाडि सरे पनि कांग्रेसका नेताहरूले यही समयभित्र आन्तरिक विवादलाई मिलाउने प्रयास गर्नुपर्छ । कांग्रेसको नेतृत्वले विवादलाई मिलाउँदा नै कांग्रेस पार्टीको भविष्य रहन्छ ।

विवाद छ भने पार्टीभित्रै छलफल गरेर समाधान गर्दा नै राम्रो हुन्छ । विवाद सबै पार्टीमा छन् । तर, कांग्रेसका नेताहरूले आफूभित्रको विवादलाई अलिक धेरै बाहिर ल्याएका छन् । यसले उनीहरूलाई नै बेफाइदा हुनेछ ।