काठमाडौं । मुक्तिश्री प्रालिका अध्यक्ष अजेयराज सुमार्गीले आफू र आफ्नो कम्पनीविरुद्ध भ्रामक समाचार निरन्तर सम्प्रेषण गर्दै आएको भन्दै कान्तिपुर पब्लिकेशनको भण्डाफोर गर्ने भएका छन् ।

सुमार्गीले कान्तिपुर दैनिक र सो पब्लिकेशनका अध्यक्ष कैलाश सिरोहियाविरुद्ध सोमबार पत्रकार सम्मेलन राखेका छन् । ‘म र म आवद्ध कम्पनीहरूविरुद्ध एक सञ्चार गृहले निरन्तर भ्रामक समाचार सम्प्रेषण गर्दै आएको छ’, पत्रकारहरूलाई पठाइएको पत्रमा भनिएको छ, ‘मेरो व्यवसायसम्बन्धी सत्यतथ्य जानकारी गराउन आयोजित पत्रकार सम्मेलनमा उपस्थितिका लागि अनुरोध गर्दछु ।’­

नयाँ बानेश्वरस्थित मुक्ति टावरमा सुमार्गीले पत्रकार सम्मेलन राखेका छन् । उनले सो पत्रकार सम्मेलनमा कैलाश सिरोहिया र उनको सञ्चारगृहले सम्प्रेषण गरेको समाचारको खण्डन गर्ने छन् ।

व्यावसायिक साझेदार सिरोहिया र सुमार्गीबीच पछिल्लो समय खटपट भएको छ । यी दुई व्यवसायी बीच रहेको खटपट मिलाउने प्रयास भए पनि मिल्न सकेको छैन ।

कान्तिपुर दैनिकले सुमार्गीविरुद्ध सिलसिलेबद्ध ढंगले समाचार सम्प्रेषण गर्दै आएको छ । आफूविरुद्ध आएका समाचारहरू गलत भएको दाबी सुमार्गीको छ ।