कालिकोट । कालिकोट जिल्लाको सान्नी त्रिवेणी गाउँपालिका वडा नं. ९ का वडाध्यक्ष दुर्गबहादुर केसी र वडा सदस्य रामबहादुर केसीलाई कुखुरो चोरीको आरोप लागेको छ ।

उनीहरूले गत फागुन ६ गते राति स्थानीय अर्जुन खत्रीको कुखुरो चोरी गरी काटेर मासु खाएको आरोप लगाएको हो ।

वडाध्यक्ष र सदस्यले कुखुरो चोरी गरेर खाएको भन्दै गाउँमा अहिले उनीहरूको राजीनामा मागिएको छ । स्थानीयले प्रेस विज्ञप्ति समेत निकालेका छन् । राजीनामा माग गरिएको प्रेस विज्ञप्तिलाई सार्वजनिकस्थलमा टाँसिएको छ ।

स्थानीयले निकालेको विज्ञप्तिमा भनिएको छ, ‘जनताको जिउधनको सुरक्षा गर्ने जनप्रतिनिधिहरूले कुखुरो चोरी गरेर खाएको प्रमाणित भएको छ । नैतिकताका आधारमा राजीनामा दिनुपर्छ ।’

वडाध्यक्ष केसीले भने आफ्नो बेइज्जत गर्न झुटो आरोप लगाएको बताएको दाबी गरेका छन् । वडाध्यक्ष केसीले कुखुरा चोरी भयो भन्ने अर्जुन केसी, गणेश लुवार, वीर केसी र रामबहादुर केसी लगायतको टोलीले आफूसँगै खाजा खाएको स्वीकारेका छन् ।

केसीले सिपखानाका व्यापारीसँग अर्जुन केसीले किनेको ब्रोइलर कुखुरो छाडेर गएपछि गणेश लुवार र रामबहादुर केसीले पकाएर बोलाएपछि आफूहरूले मासु खाएको बताए । त्यहीकारण आफूहरूमाथि कुखुरा चोरीको आरोप लगाइएको वडाध्यक्ष केसीले बताए ।

‘खाजा खाँदा उनीहरूले एकाआपसमा विवाद गरेका थिए’, केसीले भने, ‘फरक पार्टीको भन्दै अन्य विवादका आफूलाई कुखुरो चोरीको आरोप लगाएका हुन् । मैले कसरी कुखुरो चोर्न सक्छु ?’

वडाध्यक्ष केसीले कुखुरा चोरेर खाएको विषयमा गाउँपालिकामा कुनै जानकारी नभएको सान्नी त्रिवेणी गाउँपालिकाका अध्यक्ष डम्बरबहादुर शाहीले बताए ।