व्यूरोद्वारा काठमाडौंमा २७ वर्षीय युवकलाई पक्राउ

काठमाडौं । लागुऔषध गाँजा लिनलाई नाबालिकाको प्रयोग गरेको आरोपमा २७ वर्षीय फैजउल्लास साह नेपाल प्रहरीको लागुऔषध नियन्त्रण व्यूरो, कोटेश्वरले पक्राउ गरेको छ ।

आइतबार काठमाडौं महानगरपालिका–२६ बाट पर्साको धोबीनी गाउँपालिका–५ का साहलाई पक्राउ गरेको लागुऔषध नियन्त्रण व्यूरोका एसपी चक्रराज जोशीले बताएका छन् ।

साहले अमेरिकाबाट आएको गाँजा लिनका लागि १६ वर्षीया नाबालिकालाई आइतबार बिहान त्रिभुवन अन्तर्राष्ट्रिय विमानस्थलको कार्गो कम्प्लेक्समा पठाएका थिए ।

अमेरिकाबाट आएको सामान लिएपछि प्रहरीले नाबालिगलाई नियन्त्रणमा लिएको थियो ।

सामान चेकजाँच गर्दा २ किलो गाँजा भेटिएपछि नाबालिकालाई प्रहरीले नियन्त्रणमा लिएर अनुसन्धान गरेको एसपी जोशीले बताएका छन् ।