पुल हाउसका सञ्चालकको हत्या गर्ने व्यक्ति पक्राउ

काठमाडौं । साईबाबा पार्कस्थित पुल हाउसका संचालक रूपक बान्तवाको हत्या गरेको अभियोगमा प्रहरीले एकजनालाई पक्राउ गरेको छ ।

काठमाडौं महानगरपालिका–१० शंखमुल साईबाबा पार्कस्थित पुल हाउसका संचालक रूपक बान्तवाको हत्या गरेको अभियोगमा सोही ठाउँ डेरा गरी बस्ने बाराको सिम्रौनगढ नगरपालिका–७ घर भएका २२ वर्षीय एमके कुमारलाई बुधबार बिहान प्रहरीले पक्राउ गरेको विज्ञप्तिमार्फत जनाएको छ ।

कुमारले सोमबार बिहान रड प्रहार गर्दा गम्भीर घाइते भएका रूपकको सिभिल अस्पतालमा उपचारको क्रममा मृत्यु भएको थियो ।

जिल्ला प्रहरी परिसर काठमाडौंबाट खटिएको प्रहरीले कुमारलाई उनकै डेरा कोठाबाट पक्राउ गरेको हो । घटनाका सम्बन्धमा प्रहरीले आवश्यक अनुसन्धान गरिरहेको जनाएको छ ।